Ўзбекистон Яқин Шарқдаги вазият юзасидан жиддий хавотир билдирди
7 октябр куни Фаластиннинг Ғазо секторидаги ҲАМАС гуруҳи "Aл-Aқса бўрони" операцияси бошланганини эълон қилди.
Ўзбекистон Исроил ва Ғазо сектори ўртасидаги кескин вазият юзасидан муносабат билдирди.
"Ўзбекистон Республикаси Ташқи ишлар вазирлиги Фаластин-Исроил можароси ҳудудида тинч аҳоли орасида кўплаб қурбонларга олиб келган ва бутун Яқин Шарқдаги вазиятни сезиларли даражада мураккаблаштирган ҳолат кескинлашганидан жиддий хавотир билдиради.
Биз курашаётган томонларни қуролли қарама-қаршиликни тез фурсатларда тугатиш ва инқирозни сиёсий ҳамда дипломатик воситалар орқали ҳал қилиш учун барча чораларни кўришга чақирамиз.
Сўнгги воқеалар муносабати билан ҳалок бўлганларнинг оила аъзоларига чуқур ҳамдардлик билдирамиз ва барча жароҳатланганларнинг тезроқ соғайиб кетишини тилаймиз" дейилади ТИВ баёнотида.
Эслатиб ўтамиз, 7 октябр куни Фаластиннинг Ғазо секторида ҲАМАС гуруҳи "Aл-Aқса бўрони" операцияси бошланганини эълон қилди. Оқибатда икки томондан юзлаб кишилар ҳалок бўлди. Исроил томони эса армияни оёққа турғизиб, уруш бошланганини эълон қилди.
