Мирзиёев Қозоғистон президентига ҳамдардлик билдирди

Ўзбекистон Республикаси Президенти Шавкат Мирзиёев Қозоғистон Республикаси Президенти Қосим-Жомарт Тўқаевга Қарағанди вилоятидаги Костенко номидаги конда рўй берган портлаш оқибатида инсонлар ҳалок бўлгани ва жароҳат олгани муносабати билан ҳамдардлик йўллади.

Бу ҳақда президент матбуот хизмати хабар берди.

Мирзиёев кон ичида қолаётган кончилар тез фурсатда қутқарилишига умид билдирди, дейилади хабарда.

Эслатиб ўтамиз, бугун ушбу кондан ўттизга яқин кишининг жасадлари чиқариб олинди. Президент Тўқаев ҳодиса сабаб 29 октябрни Қозоғистонда мотам куни дея эълон қилди.