Ўзбекистонлик шахс Кореяда такси ҳайдовчисини калтаклашда гумонланмоқда
Гумонланувчи ўз автомобилида ноқонуний равишда йўловчи ташимоқчи бўлган, маҳаллий такси ҳайдовчиси эса бунга тўсқинлик қилиб, ҳолатни ва қоидабузарликни суратга олмоқчи бўлган.
Жанубий Кореянинг Ҳвасон шаҳрида 30 ёшлар атрофидаги Ўзбекистон фуқароси 50 ёшли такси ҳайдовчисини калтаклашда гумон қилинмоқда. Бу ҳақда қатор ммаҳаллий ОАВлар хабар берди.
Ҳодиса 18 октябрь куни Хянгнам ҳудудида содир бўлган.
Маълум бўлишича, гумонланувчи ўз автомобилида ноқонуний равишда йўловчи ташимоқчи бўлган, маҳаллий такси ҳайдовчиси эса бунга тўсқинлик қилиб, ҳолатни ва қоидабузарликни суратга олмоқчи бўлганида жағ қисмига зарба берилган. Оқибатда такси ҳайдовчиси воқеа жойида ҳушини йўқотиб, ерга йиқилган.
Автомобил кузатув камерасига муҳрланган тасвирларда тажовузкор ҳушсиз ётган фуқарони оёқлари ва муштлари билан калтаклашда давом этгани ҳамда унга биринчи ёрдам кўрсатмасдан воқеа жойидан ғойиб бўлгани акс этган.
Корея полицияси гумондорни 22 октябрь куни видео таҳлил орқали аниқлади. У тез орада расмий сўроққа чақирилади ва жабрланувчининг тиббий хулосасига асосланиб, айбловлар оширилиши мумкин.
