Президент яқин кунларда спорт соҳаси бўйича танқидий йиғилиш ўтказади
Шавкат Мирзиёев айрим ёшлар ўртасидаги ортиқча вазн, чекиш, ичкиликка берилиш, синтетик ва психотроп моддалар истеъмолини танқид қилди.
Президент Шавкат Мирзиёев бугун ўтган йиғилишда ёшлар ўртасидаги ортиқча вазн ва зарарли одатларга тўхталди.
"Бугунги кунда кам ҳаракат ва нотўғри овқатланиш оқибатида ёшларнинг қарийб 40 фоизида ортиқча вазн кузатиляпти. Чекиш, ичкиликка берилиш, синтетик ва психотроп моддалар истеъмоли камайгани йўқ!", деди президент.
Давлат раҳбари маҳаллаларда спорт инфратузилмасини кенгайтириш, ҳар бир кўча ва ҳудудда спорт майдончалари барпо этиш бўйича ҳокимликлар ва мутасаддиларга вазифалар қўйди.
Прокуратурага спорт объектларига ажратилган ер майдонларининг бошқа мақсадларга берилмаслигини қатъий назоратга олишни топшириқ берди.
Барча олий таълим муассасаларида спорт клублари ва секциялари ташкил этилиб, ёшларни оммавий спортга кенг жалб қилиш зарурлигини таъкидлади.
Президент яқин кунларда спорт соҳаси бўйича танқидий йиғилиш ўтказилишини маълум қилди.
