Қашқадарёда саноат зоналари учун деярли 12 млрд сўм ажратилади
Пуллар электр ва сув тармоғи, йўллар қурилишига сарфланиши кўзда тутилган.
Халқ депутатлари Қашқадарё вилояти кенгаши маблағ ажратиш бўйича қарор чиқарди. Қарор саноат зоналари инфратузилмасини ривожлантиришни кўзда тутади.
Ҳужжат 2025 йил 25 сентябр куни эълон қилинди.
Унга кўра, "Тадбиркорликни ривожлантириш жамғармаси" ҳисобидан 11 млрд 991 млн сўм ажратилади.
Жумладан, Китоб туманидаги Макрид саноат зонасига электр энергия тармоғини қуриш мақсадида 1,3 млрд сўм, ичимлик суви тармоғи барпо этишга 598 млн сўм, Қарши туманидаги Янгибоғ МФЙдаги саноат зонасига 1 млрд 659 млн сўм, ичимлик суви тармоғи учун 730 млн сўм, Бодомзор МФЙдаги саноат зонасига эса 1 млрд 628 млн сўм ажратилади.
Ғузор тумани, Амир Темур МФЙда йўл қурилишига 1 млрд 670 млн сўм, Миришкор тумани, Жейнов МФЙдаги ёшлар марказида автомобил йўли учун 1 млрд 70 млн сўм ажратилади.
Аввал Самарқандда икки қарор билан бюджетдан 100 млрд сўмдан ошиқ маблағ ажратилиши ххабар берилганди.
Қарорларнинг бирида Мустақилликнинг 34 йиллигини тантанали нишонлаш, Самарқанд шаҳри кўчаларини безатиш, меҳмонларни кутиб олиш ва бошқа харажатларга 10 млрд сўм берилиши ёзилган.