Шавкат Умрзоқов пул ажратиш бўйича қарор имзолади
“Тошкентнинг фаол аёли – 2026” спорт мусобақаси ҳамда “Заковат” интеллектуал ўйинининг Тошкент шаҳар босқичларини ўтказиш харажатлари учун 140 млн сўм сарфланади. Шунингдек, хизмат автомобилларининг айрим харажатлари учун ҳам маблағ берилади.
Тошкент шаҳар маҳаллий бюджетининг захира жамғармаси ҳисобидан жами 180 млн сўм ажратилди. Бу ҳақда ҳоким Шавкат Умрзоқовнинг тегишли қарори эълон қилинди.
Маблағ Тошкент шаҳар Оила ва хотин-қизлар бошқармасининг туман бўлимлари раҳбарларига бириктирилган хизмат автомобилларининг айрим харажатлари учун йўналтирилади.
Қарорда ёқилғи харажатлари учун 130 млн ҳамда мазкур автомобилларни сақлаш билан боғлиқ харажатлар учун 50 млн сўм ажратилган.
Шунингдек, “Тошкентнинг фаол аёли – 2026” спорт мусобақаси ҳамда “Заковат” интеллектуал ўйинининг Тошкент шаҳар босқичларини ўтказиш харажатлари учун яна 140 млн сарфланиши белгиланган.
Ҳужжатга кўра, мазкур қарорнинг ижросини назорат қилиш Умрзоқовнинг молия-иқтисодиёт ва камбағалликни қисқартириш масалалари бўйича биринчи ўринбосари Д.Худайбергенов зиммасига юклатилган.
