Тошкентда йўлларни таъмирлаш харажатларига 14 млрд сўм ажратилади
Ушбу пулдан пойтахтдаги 12 та туман ободонлаштириш бошқармаларига 1 млрд сўмдан берилади.
Тошкент шаҳрида йўлларни таъмирлаш учун 14 миллиард сўм ажратилади.
Тошкент шаҳар ҳокими Ш. Умурзоқов томонидан имзоланган қарорга асосан, пойтахт йўлларини таъмирлаш ва сақлаш ишларига жами 14,0 миллиард сўм маблағ йўналтирилади. Қарор 2026 йил 17 апрел куни имзоланган.
Ажратилган маблағлар шаҳар туманлари ва соҳага масъул бошқарма ўртасида қуйидагича тақсимланган:
Туман ободонлаштириш бошқармалари: 12 та туманнинг ҳар бирига 1 миллиард сўмдан (жами 12 млрд сўм);
Шаҳар марказий кўчаларидан фойдаланиш бошқармасига: Марказий кўчаларни сақлаш ва таъмирлаш учун 2 миллиард сўм.
Туман ҳокимликлари ва мутасадди бошқармаларга маблағларни фақат белгиланган мақсадда ишлатиш ва бажарилган ишлар бўйича ҳисобот бериб бориш юклатилди. Шаҳар Ғазначилик хизмати бошқармаси маблағларни тезкорлик билан молиялаштириш чораларини кўради. Давлат молиявий назорати инспекцияси маблағларнинг тўғри сарфланишини кузатиб боради.
Ушбу ишларнинг умумий ижросига шаҳар ҳокимининг биринчи ўринбосари Бахтиёр Раҳмонов масъул этиб белгиланди.
Аввалроқ Тошкентда чорраҳа, бекат ва пиёдалар йўлаклари учун 2,5 млрд сўмдан ошиқ пул ажратилганди.
