Шерзодхон Қудратхўжанинг миллатпарварлиги русларга ёқмади
Журналист блогер Кирилл Алтманга берган интервюсида русларга қарши кескин гапларни гапирди.
![Шерзодхон Қудратхўжанинг миллатпарварлиги русларга ёқмади](https://cp.platina.uz/media/CACHE/images/1-1707818861-avto11-post-material.1feea2f4b0b4.webp)
ЎзЖОКУ ректори Шерзодхон Қудратхўжа блогер Кирилл Алтманга интервю берди.
Унда Қудратхўжа бир мамлакатда яшаб туриб, уни тилини билмайдиганларни "босқинчи ёки телба" дея атаган.
Шунингдек, Журналистика университети ректори Амир Темурнинг Олтин Ўрдага юриши туфайли Россия давлати сақлаб қолингани ва кейинчалик кучайганини таъкидлаб ўтган.
Шерзодхон Қудратхўжанинг мазкур баёноти Россияда кескин реакция берди. Жумладан "Россодтрудничество" раҳбари Евгений Примаков Қудратхўжа билан ҳар қандай алоқалар тўхтатилиши ва унинг ўзи, қариндошларига Россияга кириш тақиқланишини маълум қилди.
"У бу сўзлари учун узр сўраши керак" дея ёзади Примаков.
Эслатиб ўтамиз, аввалроқ россиялик айрим арбобларнинг Ўзбекистон ҳақидаги гаплари кенг мунозараларга сабаб бўлганди. Жумладан тарихчи Михаил Смолин 1917 йилгача "ўзбек халқи бўлмагани" ҳақида иддао қилган бўлса, ёзувчи Захар Прилепин "Ўзбекистонни Россияга қўшиб олиш" ҳақида гапирганди. Прилепиннинг сўзларидан кейин Россия элчиси Ўзбекистон ТИВга чақиртирилганди.