БМТ бош ассамблеяси Россия резолюциясини маъқуллади
У "нацизм ва неонацизмни улуғлашга қарши" қаратилган. Ўзбекистон резолюцияни қўллаб овоз берди.
БМТ бош ассамблеясининг Учинчи қўмитаси "Нацизм, неонацизм ва ирқчилик, ирқий камситиш, ксенофобия ва улар билан боғлиқ муросасизликнинг замонавий шаклларининг кучайишига ёрдам берувчи бошқа амалиётларни улуғлашга қарши кураш" резолюциясини ёқлаб овоз берди. Уни Россия кўриб чиқиш учун тақдим этди.
Ҳужжатга 116 давлат овоз берди, 54 давлат қарши овоз берди. 11 давлат вакиллари овоз беришда бетараф қолди. Ўзбекистон резолюцияни қўллади.
Бирлашган Миллатлар Ташкилоти Бош Ассамблеясининг Учинчи қўмитаси резолюцияга Россиянинг Украинадаги ҳарбий амалиётини неонацизмга қарши кураш билан оқлаш истагини билдирувчи тузатиш киритди.
Тузатишни 66 давлат қўллаб-қувватлади, 43 давлат қарши овоз берди, 51 давлат бетараф қолди. Учрашувнинг ёзуви БМТ сайтида чоп этилди.
Россия резолюцияни бошқа давлатлар, жумладан, Хитой, Жанубий Африка, Шимолий Корея, Арманистон ва Сербия билан ҳаммуаллифликда тайёрлаган.
Ҳужжатда давлатларга "Иккинчи жаҳон уруши тарихи ва натижаларини қайта кўриб чиқишга йўл қўймаслик учун инсон ҳуқуқлари бўйича халқаро мажбуриятларига мувофиқ, тегишли аниқ чораларни, шу жумладан қонунчилик ва таълим соҳаларида" кўриш тавсия этилади.
Резолюция 74 банддан иборат. Унда нацизмни тарғиб қилиш ва улуғлаш билан боғлиқ воқеаларни қоралаш ҳақида ҳам сўз боради. Матн, шунингдек, нацизм билан боғлиқ "ҳар қандай тантанали байрамларни" тақиқлашни тавсия қилади. Ҳужжат шунингдек, этник келиб чиқиши, миллати, дини ёки эътиқодига кўра ирқчилик, камситиш ва нафратни тарғиб қилувчи ўқув материалларидан фойдаланишни қоралайди.
БМТ Бош Ассамблеясининг Учинчи қўмитаси инсон ҳуқуқлари билан бир қаторда ижтимоий ва гуманитар масалаларни ҳам кўриб чиқади.
