АҚШ чегарадан ноқонуний ўтганларга бошпана беришни тўхтатиб қўйди

AҚШ чегарани ноқонуний кесиб ўтганларга бошпана беришни вақтинча тақиқлаб қўйди.

Президент Жо Байден AҚШ жанубий чегараси, яъни Мексика билан чегарани ноқонуний кесиб ўтган муҳожирларга бошпана беришни вақтинча тақиқлади. Бу АҚШ иммиграция хизмати ходимларига мамлакатда ноқонуний бўлган одамларни Қўшма Штатлардан чиқариб юбориш расмиятчиликларини осонлаштиради.

Дарҳол кучга кирадиган ушбу тақиқ чоралари доимий қўлланилмайди. Reuters агентлигининг хабар қилишича, тақиқловчи чоралар ҳафта давомида ҳар куни 2500 дан ортиқ одам чегарада ушлаб қолинган вазиятда амалга татбиқ этилади. Чегарада кунлик қўлга олишлар сони 1500 кишидан камайганда, бу чоралар бекор қилинади.

Эслатиб ўтамиз, яқинда АҚШга ноқонуний кирмоқчи бўлган 3000 га яқин ўзбекистонлик қўлга олинган эди. Улар Туркия, Испания ва Мексика орқали келиб, АҚШга киришга уринган.  

Шунингдек, 3 март куни AҚШга ноқонуний равишда кирган 74 нафар Ўзбекистон фуқароси ўз ватанларига қайтарилган.