АҚШга ноқонуний кирмоқчи бўлган 3000 га яқин ўзбекистонлик қўлга олинди
Улар Туркия, Испания ва Мексика орқали келиб, АҚШга ноқонуний киришга уринган.
АҚШга ноқонуний кормоқчи бўлган 3000 га яқин ўзбекистонлик қўлга олинди.
АҚШнинг Чегара-божхона хизмати 2023 йилнинг октябридан буён, АҚШнинг Мексика билан чегарасини ноқонуний кесиб ўтгани учун Сан-Диегода 2900 ўзбекистонликни қўлга олган. Улар Туркия, Испания ва Мексика орқали келиб, АҚШга ноқонуний киришга уринган.
1 октябрдан бери Чегара-божхона хизмати фақатгина Сан-Диего секторида Ҳиндистондан 8900, Туркиядан 7800, Мавританиядан 4400, Ветнамдан 3000 ва Гвинеядан 5600 нафар ноқонуний муҳожирни тўхтатиб қолган.
Aйрим муҳожирлар аввалроқ Fox News телеканалига AҚШда яхшироқ ҳаёт излаётганликларини айтишган эди.
“Менинг инглиз тилим унчалик яхши эмас ва Қўшма Штатларда ҳеч кимни танимайман”, деган эди март ойида бир муҳожир. "AҚШга келганимдан кейин ҳаммасини бошидан бошлашим кераклигини биламан. Лекин мен келажакда яхши ҳаёт кечиришни ва фарзандларим яхши таълим олишларини истайман”.
Эслатиб ўтамиз, сўнгги вақтларда АҚШ чегарасига етиб бораётган ўзбекистонликларнинг кўпи ортга қайтарилмоқда. Март ойида юздан зиёд фуқаролар қайтарилганди. 2023 йилда АҚШ томони Мексика орқали кириб келаётганлар қабул қилинмай, депортация қилинишини маълум қилганди.
