"Ўзтелеком"нинг рекламаси билан боғлиқ тендерни кийим сотадиган фирма қўлга киритди
Радиода реклама бериш билан боғлиқ тендерни фаолият тури кийимлар улгуржи савдоси билан шуғулланиш бўлган фирма қўлга киритиши ғалати.
“Ўзтелеком” АЖ 1 июнь куни компания хизматларини радиоэфир орқали реклама қилиш учун 1,4 млрд сўмлик тендер эълон қилган. 8 июнгача давом этган мазкур тендерда “Merches” МЧЖ ғолиб деб топилган.
Давлат реестерига кўра, ушбу фирма раҳбари Олег Гришанов (россиялик) бўлиб, МЧЖнинг фаолият тури сифатида кийимларнинг улгуржи савдоси билан шуғулланиши кўрсатилган. Гришанов ушбу МЧЖнинг 80 фоиз улушига эгалик қилади, қолган 20 фоизи эса Фарҳод Ураловга тегишли.
Қизиқ томони, ушбу ҳолатда ҳаммаси қонуний бўлиши мумкин, аммо радиода реклама бериш билан боғлиқ тендерни фаолият тури кийимлар улгуржи савдоси билан шуғулланиш бўлган фирма қўлга киритиши ғалати, албатта.
Яна бир қизиқ факт шуки, АТБ “Агробанк” автобусларга реклама жойлаштириш бўйича ўтказган 480 млн. сўмлик тендерни ҳам айнан шу МЧЖ қўлга киритган. Тендерда қатнашган, аммо ютқазган яна бир МЧЖ — UTA Media Group эса азалдан автобуслардаги рекламалар билан шуғулланиб келади.