"Бохо завхоз" 10 йилга қамалди

“Бохо завхоз” ва “Терминатор” лақаблари билан танилган Баҳодир Султонов ҳамда у билан бир иш доирасида қамоққа олинган Навоийдаги автосалон директори Ниёз Ибодовга суд ҳукми билан жазо тайинланди. Суд ҳужжати Platina.uz`да мавжуд. 

 16 май куни Тошкент шаҳар Олмазор туман суди уларни Жиноят кодексининг 165-моддаси 3-қисми (жуда кўп миқдорда товламачилик) “а” бандида назарда тутилган жиноятни содир этганликда айбли деб топган. 

Суд ҳукми билан Баҳодир Султоновга 10 йил, Ниёз Ибодовга 4 йил муддатга озодликдан маҳрум қилиш жазоси тайинланган. Суд Баҳодир Султоновни ўта хавфли рецидивист деб топган.

Маълумот учун, 55 ёшли Баҳодир Султонов 1994 йили ЖКнинг бир нечта моддалари билан айбланиб, ўлим жазосига ҳукм қилинган. Орадан бир неча ой ўтиб, мазкур жазо 20 йил озодликдан маҳрум қилиш жазосига ўзгартирилган. У 2016 йили озодликка чиққан эди.

Эслатиб ӯтиш жоиз, Ниёз Ибодов Тошкент шаҳрида ўтказилган “Долзарб қирқ кунлик” тезкор-профилактик тадбирлар вақтида қўлга олинган.