Ўзини осган йигит тазйиққа учраган бўлиши мумкин
Олий Мажлиснинг Инсон ҳуқуқлари бўйича вакили (Омбудсман) ҳолатни ўрганишга киришди.
Чирчиқдаги тергов ҳибсхонасида ўзини осиб қўйган 22 ёшли йигитнинг бурни сингани ва танасида жароҳатлар борлиги аниқлангани айтилмоқда.
Мазкур ҳолатни Олий Мажлиснинг Инсон ҳуқуқлари бўйича вакили (Омбудсман) назоратга олиб, ишга тааллуқли маълумотларни сўради. Ишга оид ҳужжатлар ўрганилмоқда.
"Тўпланган ҳужжатлар ўрганилиб, Жиноят-процессуал кодексида белгиланган тартибда кўриб чиқиш учун вилоят прокуратурасига юборилади ва юқоридаги ҳолат юзасидан қўшимча маълумот берилади", дейилади омбудсман хабарида.
Эслатиб ўтамиз, Чирчиқ шаҳар ички ишлар бошқармаси тергов ҳибсхонасидан 2001 йилда туғилган йигит ўзини осиб қўйганди.
Августда Тошкентда шундай ҳолат кузатилганди. Терговга олиб борилган фуқаро тўсатдан вафот этган, у оғир жиноятда айблангани айтилганди. Лекин бу иш ҳозир қайси жараёнда экани номаълум.
