Фарғонада катта миқдорда ноқонуний тамаки ва дорилар аниқланди
Мазкур ҳолат юзасидан терговга қадар текширув ҳаракатлари олиб борилмоқда.
Фарғонада 1 млрд. 406 млн. сўмлик дори воситалари ва тамаки маҳсулотларининг ноқонуний айланмаси аниқланди.
Фарғона вилояти божхона бошқармаси Контрабандага қарши курашиш бўлими ходимлари вилоят ДХХ ходимлари билан ҳамкорликда Данғара туманида тезкор тадбир ўтказишди.
Тадбир давомида фуқаро Т.В. хонадонида ноқонуний сақланаётган, хорижда ишлаб чиқарилган, божхона расмийлаштирувидан ўтганлигини тасдиқловчи тегишли ҳужжатлари бўлмаган, умумий қиймати 1 млрд. 406 млн. сўмлик 292 мингдан зиёд сифати кафолатланмаган дори воситалари ва 30 000 қути акциз маркалари бўлмаган тамаки маҳсулотлари борлиги аниқланди.
Ҳозирда мазкур ҳолат юзасидан терговга қадар текширув ҳаракатлари олиб борилмоқда, дейилади хабарда.
Аввалроқ Наманганда катта миқдорда қалбаки дорилар фош этилгани хабар берилганди.
