Намангандаги яширин дори омборларида 5,2 млрд сўмлик маҳсулотлар аниқланди
Жами 46 865 дона, жумладан, “Эринит”, “Гемаза”, “Фенотропил” каби дори воситалари процессуал тартибда расмийлаштириб олинди.
Контрафакт дори воситалари савдосига чек қўйиш мақсадида Давлат хавфсизлик хизматининг Наманган вилояти бўйича бошқармаси ходимлари томонидан вилоят Божхона ҳамда Ички ишлар бошқармалари билан ҳамкорликда тезкор тадбир ўтказилди.
Тадбир давомида Наманган шаҳрида яшовчи, 2002, 1997 ва 1987 йилларда туғилган 3 нафар фуқаро ўзаро тил бириктирган ҳолда, 5 та хонадонда яширин омборлар ташкил этиб, тегишли сифат сертификатига эга бўлмаган катта миқдордаги дори воситаларини келгусида сотиш мақсадида сақлаб келаётганликлари аниқланди.
Натижада, хорижий давлатларда ишлаб чиқарилган ва ноқонуний йўллар билан олиб келинган 287 турдаги, жами 46 865 дона, жумладан, “Эринит”, “Гемаза”, “Фенотропил” каби дори воситалари процессуал тартибда расмийлаштириб олинди.
Уларнинг дастлабки тахминий қиймати 5,2 млрд сўмга тенг.
Ҳозирда ушбу дори воситаларига нисбатан судга оид кимёвий, товаршунослик экспертизаси тайинланиб, терговга қадар текширув ҳаракатлари олиб борилмоқда.
