Исроил Ғазонинг миллиондан ортиқ аҳолисига ҳудудни тарк этишни буюрди

Исроил Ғазо секторининг шимолий қисми аҳолисига 24 соат ичида анклавнинг жанубига кўчиб ўтишни буюрди, дейди БМТ бош котиби вакили Стефан Дюжаррик.

"Бирлашган Миллатлар Ташкилоти фожиали вазиятни ўта ҳалокатли ҳолатга айлантирмаслик учун бундай буйруқни бекор қилишга қатъий чақиради", деди у.

БМТ маълумотларига кўра, жума куни ярим тунда чиқарилган буйруқ тахминан 1,1 миллион кишига таъсир қилади - бу бутун Ғазо сектори аҳолисининг ярми. Чизиқнинг шимолида аҳолиси зич бўлган Ғазо шаҳри жойлашган.

Унинг сўзларига кўра, Исроил ҳарбийлари Ғазода ишлаётган БМТ расмийларига буйруқ ташкилотнинг барча ходимлари ва унинг ҳудудидагилар, жумладан, мактаб ва шифохоналарга ҳам тегишли эканлиги ҳақида хабардор қилган.

“Бирлашган Миллатлар Ташкилоти ҳалокатли гуманитар оқибатларсиз бундай кўчиш амалга оширилиши мумкин эмас, деб ҳисоблайди”, - дея қўшимча қилди Дюжаррик.

Aфтидан, Исроил сўнгги кунларда Ғазо чегарасига аскар, оғир артиллерия ва танкларни тўплаб, қуруқликдан ҳужумга тайёрланмоқда.

БМТ Хавфсизлик кенгаши бугун фавқулодда йиғилиш ўтказади.

Исроил мудофаа вазирлиги вакили 1,1 миллиондан ошиқ аҳолига ҳудуддан чиқиб кетиш буйруғи берилганини расман тасдиқлади. 

Эслатиб ўтамиз, Исроил чегараси ва Ғазо секторида 7 октябрдан бошлаб вазият кескинлашди. ҲАМАС гуруҳи бошлаган ҳужумлар ортидан Исроил Ғазога ракета зарбалари берди.