Сирдарёда кўприк ўпирилиб тушди

Оқолтин туманидан ўтувчи автомобил йўлида жойлашган зовур кўпригининг "Тошкент-Жиззах" йўналишидаги қисмида оралиқ қурилма балкаларининг 5 тасида ёриқ вужудга келиб, чўкиш ҳосил бўлган.

Шу муносабат билан "Тошкент-Термиз" йўналишидаги барча автотранспорт воситалари ҳаракати вақтинча чекланди, дея хабар бермоқда Сирдарё вилояти ҳокимлиги. Ушбу йўналишдаги автомобиллар ҳаракати бошқа йўналишларга кўчирилган.

Барча йўналишларда ЙПХ постлари ташкил қилиниб, ҳаракат хавфсизлигини тўлиқ таъминлаш чоралари кўрилган.

Айни вақтда мазкур кўприкда таъмирлаш-тиклаш ишлари олиб борилмоқда, дейилади хабарда.

Эслатиб ўтамиз, жорий йилнинг август ойида Тошкентда халқаро аэропортга олиб борувчи йўл ўтказгичи қулаб тушган ва уч мансабдор қўлга олинганди.