Пригожин исёнининг охири: жиноий иш ёпилгани эълон қилинди

"Вагнер" хусусий ҳарбий ширкати раҳбари Пригожинга қарши қуролли исён иши ёпилди. Бу ҳақда Россия федерал хавфсизлик хизматига асосланиб, маҳаллий ОАВ хабар бермоқда.

Махсус хизматнинг таъкидлашича, ушбу ишни тергов қилиш жараёнида унинг иштирокчилари жиноятни содир этишга қаратилган ҳаракатларни тўхтатгани аниқланган.

Россия Мудофаа вазирлиги "Вагнер" кучларидан барча оғир ҳарбий техникалар давлатга қайтарилиши жараёни бошланиши ҳақида хабар берган.

Айни пайтда Евгений Пригожиннинг қаерда экани номаълум, баъзи манбаларга кўра у Беларусга йўл олган.

Эслатиб ўтамиз, Пригожин 24 июнь куни Москвага қуролли юришини эълон қилгач, унга нисбатан жиноий иш қўзғатилганди. Ҳатто Беларус президенти Александр Лукашенко ёрдамида келишувга эришилганда ҳам иш тўхтатилмаганди.

Бундан аввал Россия президенти Владимир Путин "вагнерчилар"га мурожаат қилиб, улар уч йўлни таклиф қилганди.