Жиззахда ўтаётган “Konstitutsiya - bizniki!” тадбирида сенатор йиғлаб юборди

Жорий йилнинг 30 апрелида ўтадиган референдумга бағишлаб Жиззахда ташкил этилган “Konstitutsiya - bizniki!” тадбирида сенатор, Жиззах вилояти болалар шифохонаси бош шифокори Холида Алимова кўзда ёш билан фаолиятидаги таъсирли воқеани айтиб берди.

– Кўп йиллардан буён болалар шифокори бўлиб ишлайман. Авваллари вилоятимизда мураккаб жарроҳлик амалиётларини ўтказиб бўлмасди. Бунга шароит йўқ эди. Палатага кирганимда 11 ёшли юрагида хаста бола кириб, мен тузалиб кетаманми, мен ўлмайманми, деса жавоб йўқ эди. Кислородга улаб қўя олардик холос. Ҳеч қандай ёрдам кўрсата олмасдик. Фақатгина операция қилиш керак бўларди, аммо бу имконият бизда йўқ эди.

Кейинги бир неча йил давомида эса вазият анча ўзгарди. Жанубий Кореядан юқори малакали мутахассислар келиб вилоят болалар шифохонамизда 30 та мураккаб жарроҳлик амалиётини амалга оширди. Бу маҳаллий шифокорлар учун ўзига хос маҳорат мактабини ҳам ўтади. Ҳозир бу жарроҳлик амалиётлари ўзимизда бажарилмоқда. Бу билан нима демоқчиман, янгиланаётган Конституция билан давлат фуқароларга тиббиёт соҳасини кафолатлашни ўз зиммасига олмоқда. Инсон омили, унинг саломатлигига алоҳида эътибор қаратилган янгиланган Конституциямиз учун ўтадиган референдумда барчагизни фаол иштирок этишга ва овоз беришга чорлайман.