Халқаро қидирувда бўлган давлат ташкилоти ходимаси қўлга олинди
У Хоразм вилоятидаги Бандликка кўмаклашиш марказида мутасадди лавозимда ишлаган ва давлат маблағларини ўзлаштириш ҳамда расмий ҳужжатларни сохталаштириш билан шуғулланганликда айбланмоқда.

Ўзбекистон ва Туркия ҳуқуқни муҳофаза қилувчи органлари томонидан ўтказилган тезкор тадбир давомида халқаро қидирувда бўлган аёл қўлга олинди ва Ўзбекистонга қайтарилди.
Бу ҳақда Истанбулдаги Бош консулхона хабар берди.
Тергов маълумотларига кўра, Й.Г. Хоразм вилоятидаги Бандликка кўмаклашиш марказида мутасадди лавозимда ишлаган даврида мансаб ваколатларидан фойдаланиб, давлат маблағларини ўзлаштириш ҳамда расмий ҳужжатларни сохталаштириш билан шуғулланганликда айбланмоқда.
У Жиноят кодексининг 167-моддаси (Ўзлаштириш ёки растрата йўли билан талон-торож қилиш) ва 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) бўйича қидирувга берилганди.
Ҳозирда гумонланувчига нисбатан тергов ҳаракатлари давом этмоқда.





