Ўзбекистон ва Ўмон ўртасида 30 кунлик визасиз режим бўйича битим имзоланди
Битим ҳали кучга киргани йўқ. У зарур ички тартиб-таомиллар бажарилгани ҳақидаги сўнгги хабарнома олинганидан 30 кун ўтгач амал қила бошлайди.

Ўзбекистон ва Ўмон ўртасида 30 кунлик визасиз режим бўйича битим имзоланди.
17 ноябрь куни Президентнинг Ўмонга давлат ташрифи доирасида икки мамлакат ҳукуматлари ўртасида ўзаро визадан озод қилиш тўғрисида битим имзоланди.
Битимга кўра, икки давлат фуқаролари ҳар бир ташрифда 30 кунгача, бир календарь йил давомида жами 180 кундан ошмаган муддатда бир-бирининг ҳудудида визасиз бўлиши мумкин. Бунинг учун амал қилиш муддати камида 6 ой бўлган хорижга чиқиш биометрик паспорти талаб этилади.
Визасиз режим доимий яшаш, ўқиш ёки меҳнат рухсатномасини талаб қиладиган фаолиятга татбиқ этилмайди. Белгиланган муддатдан узоқроқ қолиш учун тегишли виза олиш керак.
Ҳужжатда форс-мажор ҳолатларида бўлиш муддатини бепул узайтириш, паспорт йўқолса ёки шикастланса, вақтинчалик йўл ҳужжати билан визасиз чиқиш тартиби ҳам назарда тутилган.
Битим ҳали кучга киргани йўқ. У зарур ички тартиб-таомиллар бажарилгани ҳақидаги сўнгги хабарнома олинганидан 30 кун ўтгач амал қила бошлайди.





