Ўзбекистонликларнинг Мисрга кириши бўйича янги талаблар кечиктирилди
2027 йил мартгача сайёҳлар Шарм-ал-Шайх ва Синай яриморолига виза олмасдан, амалдаги тартибда саёҳат қилишда давом эта олади.
Ўзбекистонликлар учун Мисрга кириш талабларини қатъийлаштириш муддати музокаралар туфайли 2027 йил 1 мартгача кечиктирилди.
Қайд этилишича, ТИВ ва Ўзбекистоннинг Қоҳирадаги элчихонаси томонидан Миср томони билан тўғридан тўғри музокаралар олиб борилиши натижасида Ўзбекистон фуқароларининг ушбу ҳудудга кириш тартибини қатъийлаштириш бўйича аввал қабул қилинган қарорни қайта кўриб чиқиш юзасидан келишувга эришилган.
Бу муддатгача сайёҳлар Шарм-ал-Шайх ва Синай яриморолига виза олмасдан, амалдаги тартибда саёҳат қилишда давом эта олади.
Ўз навбатида, Ўзбекистон ТИВ фуқароларни хорижда маҳаллий қонун ва қоидаларга қатъий риоя қилишга чақирди.
Эслатиб ўтамиз, аввалроқ 1 ноябрдан Ўзбекистон фуқаролари Синай яримороли, жумладан, Шарм-ал-Шайхга (Миср) олдиндан виза олмасдан кира олмаслиги хабар қилинганди.
