1 ноябрдан Ўзбекистон фуқароларининг Мисрга кириши бўйича янги тартиб жорий этилади
Эндиликда курорт шаҳри бўлмиш Шарм-ал-Шайх ва Синай яриморолининг бошқа ҳудудларига визани олдиндан расмийлаштирмасдан сафар қилиб бўлмайди. 40 ёшгача бўлган сайёҳлар эса Мисрга фақат яқин оила аъзолари (ота-она, эр-хотин ёки фарзандлари) ҳамроҳлигида сафар қилиши мумкин. Бунда оила тасарруфида сафар давомида камида 5000 доллар миқдорида нақд маблағ мавжуд бўлиши талаб этилади.
1 ноябрдан Ўзбекистон фуқароларининг Мисрга кириши бўйича янгиланган тартиб жорий этилади.
Бу ҳақда Ўзбекистоннинг Қоҳирадаги элчихонаси хабар берди. Хусусан, эндиликда курорт шаҳри бўлмиш Шарм-ал-Шайх ва Синай яриморолининг бошқа ҳудудларига визани олдиндан расмийлаштирмасдан сафар қилиб бўлмайди.
Визани Мисрнинг дипломатик ваколатхоналари орқали олиш мумкин. Шу билан бирга, туристик сафарлар ваколатли туроператорлар орқали ташкил этилиши лозим.
40 ёшгача бўлган сайёҳлар эса Мисрга фақат яқин оила аъзолари (ота-она, эр-хотин ёки фарзандлари) ҳамроҳлигида сафар қилиши мумкин. Бунда оила тасарруфида сафар давомида камида 5000 доллар миқдорида нақд маблағ мавжуд бўлиши талаб этилади.
40 ёшдан юқори бўлган мустақил саёҳат қилувчилар камида 3000 доллар миқдорида нақд молиявий маблағга эга бўлишлари лозим.
Мисрга кириш чоғида қуйидаги ҳужжат ва маълумотлар тақдим этилиши шарт:
меҳмонхона брон қилинганини тасдиқловчи ҳужжат;
мобил алоқа маълумотлари;
етарли молиявий таъминот тасдиғи.
Миср ҳудудида бўлиш давомида туристик визани бошқа турдаги визага алмаштириш бўйича мурожаатлар қабул қилинмайди.
Зарур ҳужжатларни тўлиқ тақдим этмаган шахслар мамлакатга киритилмаслиги ва уларни олиб келган авиакомпания орқали қайтарилиши мумкин.
Ўзбекистоннинг Қоҳира шаҳридаги элчихонаси фуқаролардан Мисрга сафарларни режалаштиришда ушбу маълумотларни инобатга олишларини сўради.
