Тошкентда икки қизнинг онаси турмуш ўртоғини зўравонликда айблаб чиқди
Мурожаатчи аёл турмуш ўртоғи 2014 ва 2021 йилларда туғилган икки нафар қизига нисбатан жинсий зўравонлик содир этганини билдирган. Гумонланувчи ҳозирда қамоққа олинди.

Тошкент шаҳрида икки нафар вояга етмаган қизга нисбатан жинсий зўравонлик содир этилгани ҳақидаги видео мурожаат юзасидан Ижтимоий ҳимоя миллий агентлиги муносабат билдирди.
Маълум қилинишича, мурожаатчи аёл турмуш ўртоғи 2014 ва 2021 йилларда туғилган икки нафар қизига нисбатан жинсий зўравонлик содир этганини билдирган.
Мазкур ҳолат юзасидан Тошкент шаҳар прокуратураси томонидан тегишли процессуал ҳаракатлар олиб борилмоқда. Зўравонликда гумон қилинаётган шахсга нисбатан қамоққа олиш тарзидаги эҳтиёт чораси қўлланилган. Мурожаат агентликнинг Тошкент шаҳар бошқармаси назоратига олинган.
“Инсон” ижтимоий хизматлар маркази мутахассислари оилага психологик ва юридик ёрдам кўрсатишни таклиф қилган. Бироқ мурожаатчи аёл болаларнинг ҳолати ва оилавий вазиятдан келиб чиқиб, бу хизматларни ҳозирча қабул қилишни ихтиёрий равишда рад этган.





