Тошкент вилоятида профилактика инспектори вояга етмаган қизни зўрлагани маълум қилинди
Инспекторнинг аёли тасодифан уларнинг учрашувига гувоҳ бўлган ва қизни калтаклаган. Жиноят ишлари бўйича Қуйи Чирчиқ туман суди аёлни Жиноят кодексининг 109-моддаси 1-қисми (қасддан баданга енгил шикаст етказиш) бўйича айбли деб топди.
Тошкент вилояти Қуйи Чирчиқ туманида профилактика инспекторининг хизмат уйида вояга етмаган қизни калтаклаган аёлга суд ҳукми ўқилди. Жабрланувчи судда инспектор уни қўрқитиб, бир неча бор жинсий алоқада бўлганини билдиргани айтилган.
Воқеа 2026 йил 10 май куни инспекторнинг Пахтазор маҳалласидаги хизмат уйида содир бўлган. Ўша куни соат 15:00 лар атрофида инспекторнинг аёли фарзандлари билан хонадонга келган ва эрини қиз билан кўрган.
Шундан сўнг аёл қизни бир неча марта уриб, унга тан жароҳати етказган. Эри уларни ажратгач, қиз кўчага қочиб чиққан. Бироқ аёл унинг ортидан бориб, яна урган ва тепган. Шунингдек, қизнинг телефонини олиб, ерга уриб синдирган. Атрофдагилар ва эри уларни ажратган.
Аёл судда айбига тўлиқ иқрор бўлиб, жабрланувчининг вояга етмаганини билмаганини айтган.
Жабрланувчи эса судда онаси иштирокида сўроқ қилинган. Унинг айтишича, профилактика инспектори билан 2025 йил март ойида танишган. Ўшанда мактабдаги дугонаси бошқа қизлар билан жанжаллашиб қолган ва у дугонасига ҳамроҳ бўлиб, инспектор ҳузурига борган. Қиз шу танишувдан кейин инспектор уни қўрқитиб, бир неча бор жинсий алоқада бўлганини билдирган.
Жиноят ишлари бўйича Қуйи Чирчиқ туман суди аёлни Жиноят кодексининг 109-моддаси 1-қисми (қасддан баданга енгил шикаст етказиш) бўйича айбли деб топган. Унга иш ҳақининг 20 фоизини давлат даромадига ушлаб қолган ҳолда 1 йил 6 ой ахлоқ тузатиш ишлари ҳамда базавий ҳисоблаш миқдорининг 20 баравари миқдорида жарима жазоси тайинланган, дейилади суд ҳукмида.
