Тошкентдаги автобусларда чиптасиз юрган айрим йўловчилар 10 мартагача жазога тортилди
Йўл ҳақини тўламаган йўловчига нисбатан Маъмурий жавобгарлик тўғрисидаги кодекснинг 144-моддаси (транспортда чиптасиз юриш) 5-қисмига асосан маъмурий жарима қўлланади.
Тошкентда автобус йўловчиларининг айримлари чиптасиз юргани сабаб бир неча марта жаримага тортилган. Бу ҳақда Тошкент шаҳар транспорт бош бошқармасининг маълум қилди.
2025 йил октябрь ойидан 2026 йил 10 ноябрга қадар пойтахт автобусларида чиптасиз юриш ҳолатлари бўйича жами 170 937 та маъмурий баённома расмийлаштирилган.
Ушбу даврда жавобгарликка тортилган шахслар орасида 22 929 нафар йўловчи икки ва ундан ортиқ марта жаримага тортилган.
Такроран жаримага тортилган 22 929 нафар йўловчининг:
17 327 нафари — 2 марта;
4033 нафари — 3 марта;
1099 нафари — 4 марта;
461 нафари — 5–9 марта;
9 нафари — 10 ва ундан ортиқ марта жавобгарликка тортилган.
Ушбу кўрсаткичлар айрим йўловчилар бир неча бор жаримага тортилганига қарамай, чиптасиз юриш ҳолатлари такрорланаётганини кўрсатмоқда.
Йўл ҳақини тўламаган йўловчига нисбатан Маъмурий жавобгарлик тўғрисидаги кодекснинг 144-моддаси (транспортда чиптасиз юриш) 5-қисмига асосан маъмурий жарима қўлланади. Унга кўра, йўловчининг шаҳар ичида ва шаҳар атрофига қатнайдиган автобусда чиптасиз юриши БҲМнинг 10 дан бир қисми (44 минг сўм) миқдорида жарима солишга сабаб бўлади.
