Қашқадарёда ота-оналар болаларни мактабга олиб бориш учун дарёдан кўтариб ўтмоқда
Вилоят ҳокимлиги масъуллар томонидан муаммонинг доимий ечимини топиш юзасидан тегишли ишлар олиб борилаётганини билдирди.
Қашқадарёда ота-оналар болаларни мактабга олиб бориш учун дарёдан кўтариб ўтаётгани ввидеоси тарқалди.
Қашқадарё вилояти Деҳқонобод туманидаги 84-мактаб ўқувчилари дарёдан ўтиб, дарсга боришга мажбур бўлаётгани айтилмоқда.
Ижтимоий тармоқларда тарқалган видеода катталар болаларни кучли сув оқими орқали қўлларида ва эшакларда кўтариб ўтказаётгани акс этган. Ўқувчиларнинг ўзлари дарёни кесиб ўтиши хавфли экани айтилмоқда.
Ҳолат ижтимоий тармоқларда кескин муҳокамаларга сабаб бўлмоқда. Фойдаланувчилар қишлоқда болалар хавфсизлиги учун кўприк қуришни талаб қилган.
Қашқадарё вилояти ҳокимлигига кўра, масъуллар мазкур ҳолатдан масъул ташкилотлар хабардор. Аниқланишича, ушбу ҳудуд мавсумий сел сувлари оқиб ўтадиган табиий ўзан ҳисобланади. Шу билан бирга, болаларнинг таълим муассасасига бориш-келишида бундай хавфли вазиятларга дуч келишига йўл қўйиб бўлмайди.
Айни пайтда масъуллар томонидан ҳудуддаги вазиятни ўрганиш, болалар хавфсизлигини таъминлаш бўйича зарур чораларни белгилаш ҳамда муаммонинг доимий ечимини топиш юзасидан тегишли ишлар олиб борилмоқда.
