Истанбулда Ўзбекистон – Туркия туризм форуми: туроператорлар ҳамкорлиги ва Ўзбекистоннинг туризм салоҳияти тақдимоти ташкил этилди

Истанбул шаҳрида Ўзбекистон – Туркия туризм форуми бўлиб ўтди. Унда икки мамлакат туризм соҳаси вакиллари, етакчи туроператорлар, сайёҳлик компаниялари, маҳаллий ва халқаро авиакомпаниялари ҳамда Туркиянинг етакчи оммавий ахборот воситалари ва интернет нашрлари вакиллари иштирок этди. Туризм ва маданият вазирлиги билан ҳамкорликда ташкил этилган форум давомида Ўзбекистоннинг бой тарихий-маданий мероси, зиёрат туризми салоҳияти, замонавий туристик инфратузилмаси ва янги сайёҳлик йўналишлари тақдим этилди. Туркиядан мамлакатимизга сайёҳлар оқимини ошириш, янги туристик маҳсулотларни шакллантириш ва икки давлат ўртасидаги сайёҳлик алмашинувини кенгайтириш масалалари муҳокама қилинди.

Тадбир доирасида Ўзбекистон ва Туркия туроператорлари ўртасида B2B учрашувлари ташкил этилиб, қўшма турпакетлар ишлаб чиқиш, янги сайёҳлик дастурларини йўлга қўйиш ҳамда ўзаро бизнес алоқаларини мустаҳкамлаш юзасидан музокаралар ўтказилди.

Шунингдек, Туркиянинг етакчи ОАВ ва интернет нашрлари вакилларига мамлакатимизда туризм соҳасида амалга оширилаётган ислоҳотлар, янги имкониятлар ва сайёҳлик манзиллари ҳақида маълумот берилди. Ўзбекистоннинг туризм салоҳиятини Туркия ахборот маконида кенг ёритиш бўйича ҳамкорлик истиқболлари кўриб чиқилди.

Форум якунида икки мамлакат туризм компаниялари ўртасида ҳамкорликни ривожлантириш, қўшма туристик маҳсулотларни шакллантириш ва Ўзбекистонга туркиялик сайёҳлар оқимини оширишга қаратилган амалий келишувларга эришилди. Шунингдек, мамлакатимизнинг туризм салоҳиятини Туркия оммавий ахборот воситалари орқали тарғиб қилиш бўйича ҳамкорликнинг устувор йўналишлари белгилаб олинди.