Тошкентга учган самолётда жанжал кўтарган россиялик қамалди
Ҳуқуқбузар парвоз вақтида борт кузатувчисидан спиртли ичимлик беришни сўраган, аммо мастлиги сабабли рад жавобини олган.
Тошкентга учган самолётда жанжал кўтарган россиялик 7 суткага қамалди.
Россия фуқароси Малайзиядан Тошкентга учиб келаётган самолётда маст ҳолда жанжал кўтариб, борт кузатувчилар ва йўловчиларни ҳақорат қилган. Жанжал борт кузатувчиси унга спиртли ичимлик беришни рад этганидан кейин бошланган.
Суд мажлисида В.К. айбига иқрор бўлган. Унинг айтишича, парвоз вақтида борт кузатувчисидан спиртли ичимлик беришни сўраган, аммо мастлиги сабабли рад жавобини олган. Шундан кейин улар ўртасида тортишув келиб чиққан.
Самолёт Тошкент халқаро аэропортига қўнганидан кейин йўловчи ички ишлар ходимларининг қонуний талабларига бўйсунмасдан ҳақоратли сўзлар ишлатишда давом этган: ўзига тегишли қўл юкини самолёт трапидан ерга улоқтириб, тепган.
Суд йўловчини майда безорилик ва ички ишлар ходимларининг қонуний талабларини бажармасликда айбдор деб топди. Унга 7 сутка маъмурий қамоқ жазоси тайинланди.
