Сержио Гор АҚШ давлат котиби бўлиши мумкин
У айни пайтда АҚШ президентининг Жанубий ва Марказий Осиё ишлари бўйича махсус вакили ва Ҳиндистондаги элчи саналади.
АҚШнинг Жанубий ва Марказий Осиё ишлари бўйича махсус вакили ва АҚШнинг Ҳиндистондаги элчиси Серхио Гор АҚШ маъмуриятида янги юқори лавозимни, жумладан, давлат котиби ёки Оқ уй аппарати раҳбари лавозимини эгаллаши мумкин.
Бу ҳақда The Washington Sun нашри хабар берди.
Манбага кўра, у "Трампнинг яқин иттифоқчиси"," Вашингтон ва Осиёнинг катта қисми ўртасидаги алоқаларда асосий шахс" ва "котиб Рубионинг ишончли ёрдамчиси" саналади.
Нашрнинг таъкидлашича, на Рубио, на ҳозирда Оқ уй аппарати раҳбари бўлган Уайлс "АҚШ маъмуриятидан кетиш ниятини очиқчасига билдирмаган".
Бироқ, Давлат департаменти ва республикачи сиёсий доиралардаги баъзи одамлар "Рубио 2028 ёки 2032 йилларда бўлиб ўтадиган президентлик сайловларига тайёргарлик кўриш учун ҳукуматдан кетиши мумкин" деб ҳисоблашади.
Манбаларга кўра, Гор Вашингтон маъмуриятида янги юқори лавозимга, жумладан, Давлат котиби ўринбосарига қизиқиш билдирган.
