Профилактика инспекторлари Бўрижар каналига ўзини ташлаган қизни қутқарди
Ҳудуддан ўтиб кетаётган йигит қизнинг сувга сакраганини кўриб қолган ҳамда бу ҳақда зудлик билан 102 хизматига хабар берган.
Тошкент шаҳридаги Бўрижар каналига ўзини ташлаган қиз ҳуқуқ-тартибот идоралари ходимлари томонидан қутқариб қолинди. Бу ҳақда Тошкент шаҳар ИИББ ахборот хизмати эълон қилган видеолавҳада айтилади.
Маълум қилинишича, ҳолат Бўрижар каналининг аҳоли сайр қилишига мўлжалланмаган ёпиқ қисмида содир бўлган. Ҳудуддан ўтиб кетаётган йигит қизнинг сувга сакраганини кўриб қолган ҳамда бу ҳақда зудлик билан 102 хизматига хабар берган.
Навбатчилик қисмига хабар келиб тушгач, профилактика инспекторлари тезкорлик билан воқеа жойига етиб борган. Мурожаат қилган фуқаронинг кўрсатмаси асосида қизни қидириш бошланган. Сувдаги айланма ҳаракат оқибатида қиз каналнинг четки қисмига ўтиб, осилиб турган ҳолатда топилган. Ходимлардан бири хизмат кийимида дарҳол сувга тушган ва шериги ёрдамида қизни қирғоққа тортиб олган.
Профилактика инспекторининг сўзларига кўра, агар бироз кечикилса қизни сув тортиб кетиши мумкин эди.
Қутқарилган фуқаро 5-сонли шифохонага олиб борилган. Унга биринчи тиббий ёрдам кўрсатилгач, қиз ўзига келган. Шахсига ойдинлик киритилгандан сўнг, ота-онаси чақиртирилиб, қиз уларга соғ-саломат топширилган. Ҳозирда унинг ҳолати барқарор.
