Хотин-қизларнинг 100 та энг яхши инновацион лойиҳаси тақдирланди
Танловга республиканинг турли ҳудудларидан 900 дан зиёд ариза келиб тушди. Техник экспертизадан сўнг 565 та лойиҳа экспертлар томонидан баҳолаш учун қабул қилинди.
“InnoWeek–2026” — халкаро инновацион ғоялар ҳафталиги доирасида хотин-қизлар ўртасида ўтказилган “Ҳудуднинг энг яхши 100 та инновацион лойиҳаси” танлови ғолибларини тақдирлаш маросими бўлиб ўтди.
Тадбирда Таълим ва илм-фан вазири ўринбосари Меҳринисо Пардаева ҳамда Оила ва хотин-қизлар қўмитаси раисининг биринчи ўринбосари Умида Абдуллаева иштирок этди.
Мазкур танлов Оила ва хотин-қизлар қўмитаси ҳамда Инновацион ривожланиш агентлиги ҳамкорлигида ташкил этилди. Унинг асосий мақсади хотин-қизларнинг илмий ва инновацион салоҳиятини рўёбга чиқариш, истиқболли ғоя ва лойиҳаларини қўллаб-қувватлаш ҳамда илмий ишланмаларни амалиётга жорий этишга кўмаклашишдан иборат.
Танловга республиканинг турли ҳудудларидан 900 дан зиёд ариза келиб тушди. Техник экспертизадан сўнг 565 та лойиҳа экспертлар томонидан баҳолаш учун қабул қилинди. Тақдим этилган лойиҳалар белгиланган мезонлар асосида ўрганилиб, натижаларга кўра 100 та энг яхши инновацион лойиҳа саралаб олинди.
Тақдирлаш маросимида сараланган лойиҳалар муаллифлари эътироф этилиб, уларга бир марталик пул мукофотлари топширилди.
Танлов доирасида лойиҳалар қуйидаги 10 та йўналиш бўйича баҳоланди:
Энг яхши рақамли инновация;
Энг яхши технологик инновация;
Энг яхши яшил инновация;
Энг яхши агроинновация;
Энг яхши тиббий ва биоинновация;
Энг яхши энергетик инновация;
Энг яхши таълим ва ижтимоий инновация;
Энг яхши саноат ва ишлаб чиқариш инновацияси;
Энг яхши ихтиро ва янги техник ечим;
Энг яхши тижоратлаштирилган инновацион лойиҳа.
Ушбу танлов хотин-қизларнинг илм-фан ва инновациялар соҳасидаги фаоллигини ошириш, янги ташаббусларини рўёбга чиқариш ҳамда илмий ишланмаларини амалиётга татбиқ этиш учун қўшимча имкониятлар яратишга хизмат қилади.
