Тошкент ва Фарғонада катта миқдордаги наркотик моддалар аниқланди
Юнусобод туманида истиқомат қилувчи шахс уйидан салкам 3 кг гашиш мойи топилган.
Давлат хавфсизлик хизматининг Тошкент шаҳар бўйича бошқармаси ходимлари томонидан пойтахт ИИББ билан ҳамкорликда ўтказилган тезкор тадбирда олдиндан кузатувга олинган, Юнусобод туманида истиқомат қилувчи, 1993 й.т. шахс тўхтатилиб, холислар иштирокида текширилди.
Натижада, унинг ёнида 3 дона кичик ҳажмдаги идишларда жами 257 гр гашиш мойи борлиги аниқланди.
Сўнгра тезкор тадбир давом эттирилиб, унинг яшаш манзилидан соф оғирлиги 2 кг 831 гр бўлган гашиш мойи ва электрон торози ашёвий далил сифатида олинди.
Шунингдек, мазкур шахснинг интернет наркодўконда ишлаши ҳам маълум бўлди.
Бу йўналишда Давлат хавфсизлик хизматининг Фарғона вилояти бўйича бошқармаси ходимлари ҳам вилоят Божхона ва Ички ишлар бошқармалари билан ҳамкорликда тезкор тадбирлар ўтказишди.
Жумладан, Фарғона туманида яшовчи, 1988 й.т. шахс қўшни давлатдан контрабанда йўли билан келтирилган 982 гр “гашиш” моддасини шартли харидорга 10700 АҚШ долларига сотмоқчи бўлган вақтида ашёвий далиллар билан ушланди.
Бошқа ҳолатда эса Фарғона шаҳрида истиқомат қилувчи, 1997 й.т. фуқаро муқаддам наркокуръерлар томонидан қўшни давлатдан контрабанда қилиниб, Фарғона туманидаги хуфия жойга қолдириб кетилган 956 гр “гашиш” моддасини қабул қилиб олиб, доимий яшаш манзилига қайтиб кетаётган вақтида ушланди.
Ҳозирда учала ҳолат юзасидан жиноят ишлари қўзғатилиб, тергов ҳаракатлари олиб борилмоқда.
