“Док-1 Макс" жабрланувчиларига компенсация пуллари тўлиқ тўлаб берилди
Аввалроқ судланганлардан белгиланган товон пулининг атиги 20 фоизи ундирилгани айтилганди. Компенсациянинг қолган қисми 2026 йил 20–24 октябрь кунлари давлат ҳисобидан тўланган.
Ўзбекистонда “Док-1 Макс” ва “Амбронол” дори воситаларидан жабрланган болаларнинг оилаларига компенсация тўлиқ тўлаб берилди. Бу ҳақда фарзанди вафот этган ҳамда ногиронлик орттирган болаларнинг ота-оналари маълум қилган.
Компенсациянинг қолган қисми 2026 йил 20–24 октябрь кунлари давлат ҳисобидан тўланган. Бош прокуратура ҳузуридаги Мажбурий ижро бюроси (МИБ) матбуот котиби Фаррух Тошпўлатов ҳам ушбу маълумотни тасдиқлади.
Суд ҳукмларига кўра, жабрланувчиларга тўланиши белгиланган компенсация Фармацевтика тармоғини ривожлантириш агентлигининг собиқ раҳбари ва унинг ўринбосарлари, шунингдек, дори ишлаб чиқарувчининг Ўзбекистондаги расмий дилери — Қурамах МЧЖ вакилларидан ундирилиши керак эди.
Бироқ ОАВ ота-оналар тақдим этган банк ҳужжатларини ўрганиб, уч йил давомида судланганлардан белгиланган товон пулининг атиги 20 фоизи ундирилганини аниқлаган. Охирги ундирув 2026 йил август ойида амалга оширилган.
Октябрь ойида эса компенсациянинг қолган 80 фоизи давлат ҳисобидан тўлиқ қоплаб берилган. Ота-оналарнинг билдиришича, масъуллар ногиронлик орттирган болаларнинг ҳолидан ҳам хабар олмоқда.
