Самарқандда ЙПХ ходимининг қонуний талабига бўйсунмай, уни ҳақорат қилган ўқувчилар ушланди
Ўқувчилар ижарага олинган Malibu-2 автомобилида Иштихон тумани кўчаларида ҳаракатланиб, ЙПХ ходимининг тўхташ талабига бўйсунмаган. Ходимни ҳақорат қилиб, уни обрўсизлантирувчи видеотасвирларни ижтимоий тармоқларга жойлаштирган.
Самарқанд вилоятининг Иштихон туманида ЙПХ ходимининг қонуний талабига бўйсунмай, уни ҳақорат қилган техникум ўқувчилари аниқланди. Бу ҳақда вилоят ЙҲХБ хабар берди.
Техникум ўқувчилари ижарага олинган Malibu-2 автомобилида Иштихон тумани кўчаларида ҳаракатланиб, ЙПХ ходимининг тўхташ талабига бўйсунмаган. Шунингдек, улар ходимни ҳақорат қилиб, уни обрўсизлантирувчи видеотасвирларни ижтимоий тармоқларга жойлаштирган.
ЙҲХБ эълон қилган видеода ўқувчилардан бири автомобилни 1,2 млн сўмга ижарага олганини ва ЙПХ ходимининг тўхташ талабига бўйсунмаганини айтган.
Яна бир ўқувчи эса ЙПХ ходимларининг тўхташ талабига бўйсунмай, қочиб кетганини ва уларни ҳақорат қилганини билдирган.
Ўрганишлар давомида қоидабузарликларни содир этган шахслар Каттақўрғон туманидаги 2-сонли техникум ўқувчилари экани аниқланган.
Шундан сўнг ҳолат ўқувчилар таҳсил олаётган таълим муассасасида танқидий муҳокама қилинган.
Ҳолат юзасидан Иштихон тумани ички ишлар бўлими томонидан тегишли ҳужжатлар расмийлаштирилган. Тўпланган материаллар қонуний қарор қабул қилиш учун прокуратура органларига юборилди.
