Юзлаб самолётлар дрон таҳдиди сабаб Москвага қўна олмади
Натижада Тошкентдан учиб келаётган "Аэрофлот" рейси Санкт-Петербургга, Самарқанддан учиб келаётган Ural Airlines рейси эса Екатеринбургга йўналтирилди.
16 октябр куни Ўзбекистондан учган иккита самолёт ва яна 370 дан ортиқ бошқа рейслар дрон таҳдидлари туфайли Москвага қўна олмади.
Хабар берилишича, тунги парвозларга чекловлар қўйилганидан сўнг, Москва аэропортларида 370 дан ортиқ рейслар кечиктирилди ёки бекор қилинди. Тошкентдан учиб келаётган "Аэрофлот" рейси Санкт-Петербургга, Самарқанддан учиб келаётган Ural Airlines рейси эса Екатеринбургга йўналтирилди.
Москва мери Сергей Собяниннинг сўзларига кўра, тунги вақтда шаҳарга яқинлашаётганда 134 та дрон уриб туширилган. Парвозларга қўйилган чекловлар бугун эрталаб бекор қилина бошлади.
Бундан ташқари Росавиация хабарларига кўра, Санкт-Петербург (Пулково), Пенза, Саратов, Саранск, Уфа, Геленджик, Калуга, Нижний Новгород, Тамбов, Пермь, Псков, Калининград, Череповец, Қозон, Ярославль, Ульяновск, Чебоксари, Киров, Самара, Екатеринбург, Тюмень, Нижнекамск ва Ижевск аэропортларида вақтинчалик чекловлар жорий этилди.
Россия Мудофаа вазирлиги эрталабки янгиланишида Россиянинг 26 та минтақасида 644 та Украина учувчисиз учиш аппарати йўқ қилингани ёки ушлангани ҳақида хабар берди.
