Новосибирскда оғир аҳволга тушган оила Ўзбекистонга қайтарилди
Ота-она Россия миграция қонунчилиги талабларини бузгани сабабли уларнинг 6 ёшли ўғли ва 12 ёшли қизи Новосибирскдаги иккита реабилитация марказига жойлаштирилган.
Россиянинг Новосибирск шаҳрида реабилитация марказларига вақтинча васийликка олинган икки нафар ўзбекистонлик бола ота-онасига топширилди. Бу ҳақда "Дунё" ахборот агентлиги хабар берди.
Маълум қилинишича, ота-она Россия миграция қонунчилиги талабларини бузгани сабабли уларнинг 6 ёшли ўғли ва 12 ёшли қизи Новосибирск шаҳридаги иккита реабилитация марказига жойлаштирилган.
Ўзбекистоннинг Новосибирск шаҳридаги Бош консулхонаси дипломатлари болаларни оиласига қайтариш учун зарур ҳужжатларни, жумладан, ватанга қайтиш гувоҳномаларини қисқа муддатда расмийлаштирган. Шунингдек, Хорижий фуқароларни вақтинча сақлаш маркази ва реабилитация марказлари раҳбарияти билан музокаралар ўтказилган.
Кўрилган чоралар натижасида болалар дипломатлар ҳамроҳлигида Новосибирск халқаро аэропортига олиб келиниб, ота-онасига топширилган.
Оила 13 октябрь куни "Новосибирск — Фарғона" йўналиши бўйича Ўзбекистонга қайтарилган.
