Фарғона йўли кўчасидаги автобус йўлакларида камералар ўрнатилди
Жамоат транспорти ҳаракатига устуворлик бериш мақсадида пойтахтнинг бошқа кўчаларидаги ажратилган йўлакларда ҳам назорат камералари босқичма-босқич ишга туширилмоқда.
Фарғона йўли кўчасида автобуслар учун ажратилган «А» йўлакларида ҳаракатни назорат қилувчи камералар ўрнатилди. Бу ҳақда Тошкент шаҳрида Йўл ҳаракатини ташкил этиш маркази хабар берди.
Фарғона йўли кўчасининг 6 километрли қисмида, ҳар икки йўналишда «А» ажратилган йўлаклар бўйлаб ҳаракатланишни назорат қилувчи камералар ўрнатилди.
Шунингдек, жамоат транспорти ҳаракатига устуворлик бериш мақсадида пойтахтнинг бошқа кўчаларидаги ажратилган йўлакларда ҳам назорат камералари босқичма-босқич ишга туширилмоқда.
Нима учун автобуслар учун ажратилган йўлакни банд қилмаслик муҳим?
Битта автобусда бир вақтнинг ўзида 50 нафардан ортиқ йўловчи бўлиши мумкин. Автомобил ажратилган йўлакка чиқиб, автобус ҳаракатига тўсқинлик қилса, бу шунчаки битта транспорт воситасининг эмас, балки ишга, ўқишга, уйига ёки бошқа муҳим юмушлари билан шошилаётган ўнлаб инсонларнинг кечикишига сабаб бўлади.
Яъни битта автомобил сабабли 50 нафардан ортиқ инсон вақт йўқотиши мумкин. Агар бир нечта автобуснинг ҳаракати кечикса, бундан азият чекадиган йўловчилар сони янада ортади.
Айнан шу сабабли ажратилган йўлаклар жамоат транспортининг ортиқча кечикишларсиз ҳаракатланиши, қатнов жадвалига риоя қилиши ва йўловчиларнинг манзилига ўз вақтида етиб боришини таъминлаш учун мўлжалланган.
Эслатиб ўтамиз: соат 06:00 дан 23:00 гача «А» ажратилган йўлакларда ҳаракатланиш ҳуқуқига эга бўлмаган транспорт воситаларининг ҳаракатланиши тақиқланади.
