Чирчиқда пора олган ички ишлар ходимлари 6 йилга қамалди
Шу йил 17 феврал куни Чирчиқ шаҳрида 28 ёшли фуқаро бир гуруҳ шахслар томонидан калтакланган. Ходимлар жабрланувчининг аризасини қайтариб олиш ва ишни ёпиш эвазига 3 минг доллар талаб қилган.
Чирчиқ шаҳрида калтаклаш ҳолати бўйича жиноят иши қўзғатмаслик эвазига пора олган ИИБ бўлим бошлиғи ва профилактика инспекторининг ҳар бири 6 йилга озодликдан маҳрум қилинди. Мазкур иш бўйича суд тафсилотлари эълон қилинди.
Шу йил 17 феврал куни Чирчиқ шаҳрида 28 ёшли фуқаро бир гуруҳ шахслар томонидан калтакланган. Тан жароҳати олган эркак шифохонага олиб кетилган. Ҳодисани текшириш профилактика инспекторига топширилган.
Жабрланувчи ўзини калтаклаганларга нисбатан қонуний чора кўрилишини талаб қилган. Бироқ унинг суддаги кўрсатмасига кўра, инспектор айбдорларни ҳатто маъмурий жавобгарликка ҳам тортиб бўлмаслигини айтган.
Инспектор жабрланувчига даволаниш харажатлари учун пул ундириб беришни таклиф қилган. Жабрланувчи бунга рози бўлган. Суд ҳужжатига кўра, инспектор бўлим бошлиғи билан келишиб, калтаклашда иштирок этган шахслардан жабрланувчининг аризасини қайтариб олиш ва ишни ёпиш эвазига 3 минг доллар талаб қилган.
18 феврал куни улардан бири танишидан қарз олиб, бўлим бошлиғига 2700 доллар берган. Бироқ бу маблағнинг ҳаммаси жабрланувчига етиб бормаган. Унинг суддаги кўрсатмасига кўра, дастлаб 2000 доллар берилган. Кейин эса у 100 долларини бўлим бошлиғига, 900 долларини инспекторга қайтариб берган. Натижада қўлида 1000 доллар қолган. Суд хулосасида ҳам 2700 долларнинг 1700 доллари мансабдорлар ўртасида тақсимлангани қайд этилган.
19 февраль куни жабрланувчи зарари қоплангани ва ҳеч кимга даъвоси йўқлиги ҳақида ариза ёзган. Орадан тўққиз кун ўтиб, 28 февраль куни калтаклаш ҳолати юзасидан жиноят иши қўзғатиш рад этилган. Бироқ 5 март куни ушбу ҳолат бўйича жиноят иши қўзғатилиб, Ички ишлар вазирлиги Тергов департаменти терговни бошлаган.
Тергов давомида калтаклашда иштирок этган шахсларнинг яқинлари илгари берилган 2700 долларни қайтаришни талаб қилган. Жабрланувчининг айтишича, терговчи бу талабни унга етказган. Эркак эса пулнинг катта қисми ИИБ ходимларида қолганини айтмай, маблағни ўзи ишлатиб юборганини билдирган.
20 апрел куни жабрланувчи Давлат хавфсизлик хизматининг Тошкент вилояти бошқармасига мурожаат қилиб, мансабдорларга нисбатан чора кўришни сўраган. Уч кундан сўнг ўтказилган тезкор тадбир давомида профилактика инспектори унга 300 доллар берган. Жабрланувчининг суддаги кўрсатмасига кўра, инспектор бу пулни бўлим бошлиғи берганини, ўзининг 200 долларини эса эртаси куни қайтаришини айтган.
Судда ҳар иккала ИИБ ходими айбини тан олмаган. Бироқ суд гувоҳларнинг кўрсатмалари, телефон суҳбатлари ёзувлари ва бошқа далилларни ўрганиб, уларнинг айби исботланган деган хулосага келган.
Чирчиқ шаҳар суди Н.А. ва Д.Р.ни Жиноят кодексининг 210-моддаси 2-қисми “в”, “г” бандлари (пора олиш) ҳамда бошқа тегишли моддалари билан айбли деб топди. Уларнинг ҳар бирига 6 йил озодликдан маҳрум қилиш жазоси тайинланди. Шунингдек, улар 3 йил давомида ички ишлар органларида ишлаш ҳуқуқидан маҳрум қилинди.
