Импортда олдиндан тўлов имконияти яратилди, экспортда 50 фоизлик талаб бекор қилинди
Божхона соҳасида тадбиркорлар учун ташқи савдо операцияларини амалга оширишни енгиллаштирувчи янги тартиблар жорий этилмоқда. Миллий валютада товарларни қарзга экспорт қилишга рухсат берилди. Ушбу ўзгаришлар, айниқса, кичик бизнес ва электрон тижорат иштирокчилари учун янги имкониятлар яратади.
Президентнинг 2026 йил 27 августдаги ПФ–174-сон Фармонига мувофиқ, эндиликда импортда ягона инвойс асосида товар мамлакатга етиб келишидан олдин тўловни амалга ошириш мумкин. Экспортда эса инвойс асосида операциялар учун талаб этилган 50 фоизлик олдиндан валюта тушуми талаби бекор қилинди.
Шунингдек, миллий валютада товарларни қарзга экспорт қилишга рухсат берилди. Ушбу ўзгаришлар, айниқса, кичик бизнес ва электрон тижорат иштирокчилари учун янги имкониятлар яратади.
Соҳани рақамлаштириш натижасида 2026 йилнинг 9 ойида экспорт декларацияларининг 94 фоизи, импорт декларацияларининг эса 90 фоизи соддалаштирилган тартибда расмийлаштирилди. 185 мингдан ортиқ декларация инсон омилисиз расмийлаштирилиб, 8 мингта экспортёр ва 51 мингта импортёрнинг вақти ҳамда ортиқча харажатлари тежалди.
Шу даврда 14 мингдан ортиқ ташқи иқтисодий фаолият иштирокчисига 45,8 трлн сўмлик божхона имтиёзлари ва преференциялар қўлланди, яна 6,6 трлн сўмлик божхона тўловларини кечиктириб тўлашга рухсат берилди.
Тадбиркорлар учун яна бир муҳим янгилик — “Интеграциялашган тариф” интерактив хизматининг янги версияси ишлаб чиқилди. Унда сунъий интеллект элементлари ёрдамида товарлар бўйича маълумотларни излаш, тариф ва нотариф тартибга солиш чораларини аниқлаш мумкин. Бу импорт ва экспорт операцияларини режалаштиришда зарур талаблар ва тўловлар ҳақида олдиндан маълумот олишни енгиллаштиради.
Божхона аудити ҳам профилактик ёндашув асосида такомиллаштирилмоқда. Камчилик аниқланган ҳолатларда тадбиркорга уни мустақил равишда бартараф этиш имконини бериш — “маслаҳатчи-аудитор” тамойилининг асосий мазмунидир. Шунингдек, “Божхона аудити” ахборот тизимида сунъий интеллект асосидаги “AI-таҳлил” технологиясини жорий этиш режалаштирилган. У декларациялар, тижорат ҳужжатлари, товарлар ва тўловлар ҳақидаги маълумотларни солиштириб, эҳтимолий тафовут ва хавфларни автоматик аниқлашга хизмат қилади.
2030 йилга қадар инсон омилисиз божхона расмийлаштируви улушини 60 фоизга етказиш, расмийлаштириш вақтини икки баравар қисқартириш ва божхона хизматлари сифатини ошириш белгиланган.
