Президент Осиё ўйинлари иштирокчиларини тарихий натижа билан табриклади
45 давлатдан 11 мингга яқин спортчи иштирок этган мусобақада Ўзбекистон терма жамоаси 21 та олтин, 25 та кумуш ва 24 та бронза медалини қўлга киритди. Шу тариқа, Ўзбекистон медаллар жамғариш бўйича Хитой, Япония, Жанубий Корея ва Ҳиндистондан кейин 5-ўринни эгаллади.
Президент Шавкат Мирзиёев Япониянинг Аичи-Нагоя шаҳрида бўлиб ўтган XX ёзги Осиё ўйинларида иштирок этган Ўзбекистон спорт делегацияси аъзоларини қўлга киритилган тарихий натижалар билан табриклади.
Давлат раҳбарининг табригида қайд этилишича, 45 давлатдан 11 мингга яқин спортчи иштирок этган мусобақада Ўзбекистон терма жамоаси 21 та олтин, 25 та кумуш ва 24 та бронза медалини қўлга киритган.
Шу тариқа, Ўзбекистон медаллар жамғариш бўйича Хитой, Япония, Жанубий Корея ва Ҳиндистондан кейин 5-ўринни эгаллади. Шу билан бирга, Марказий Осиё мамлакатлари ҳамда Ислом ҳамкорлик ташкилоти давлатлари орасида биринчи бўлди.
Президент айрим спортчиларнинг тарихий натижаларини алоҳида эътироф этди.
Жумладан, Абдулваҳоб Рашидов эркаклар ўртасидаги каратэ баҳсларида, Шоҳсанам Шерзодова якка каноэда эшкак эшиш дастурида, Ўткирбек Жўраев эса спорт гимнастикасида Ўзбекистоннинг Осиё ўйинларидаги илк олтин медалларини қўлга киритди.
Енгил атлетикачи Суҳроб Хўжаев босқон улоқтириш бўйича Осиё ўйинлари олтинини олган биринчи ўзбек спортчисига айланди. Барнохон Сайфуллаева баландликка сакрашда 1,90 метр натижа қайд этиб, олтин медаль билан бирга шахсий рекордини ҳам янгилади.
Шарифа Давронова ва Абдумалик Халлаков икки карра, Тахмина Икромова эса уч карра Осиё ўйинлари чемпиони бўлди.
Академик эшкак эшиш бўйича Шаҳзод Нурматов ва Собир Сафаралиев жуфтлиги жаҳон чемпионатидаги тарихий олтин медалдан кейин Осиё ўйинларида ҳам етакчиликни сақлаб қолди.
Оғир атлетикачи Акбар Жўраев 197 килограмм натижа билан жаҳон ва Осиё рекордини янгилади. У, шунингдек, Осиё ўйинлари рекордини ҳам ўрнатди.
Ўқ отиш бўйича Владимир Свечников Ўзбекистонга ушбу йўналишдаги илк Осиё ўйинлари олтин медалини олиб келди ва мусобақа рекордини ўрнатди.
Дзюдочи Музаффарбек Тўрабоев чорак финалда Париж-2024 Олимпиадаси совриндори Ким Мун Жонгни, финалда эса Япония вакили Ота Ҳёгани мағлуб этиб, Осиё ўйинларида икки вазн тоифасида ғалаба қозонган илк чемпион сифатида тарихга кирди.
Ўзбекистон дзюдо терма жамоаси 2 та олтин, 2 та кумуш ва 3 та бронза медали билан Япониядан кейин умумжамоа ҳисобида иккинчи ўринни эгаллади.
Ўзбек кураши бўйича эса 6 та олтин медалнинг тўрттаси Аҳрор Зиёдуллаев, Шоҳруххон Бахтиёров, Ибодатхон Агожонова ва Покизахон Камолдинова ҳисобига ёзилди.
"Сизлар Осиё ўйинларидаги ғалабангиз билан Янги Ўзбекистонда Олимпия ҳаракати ривожи янги босқичга кўтарилгани, бу йўлда янги олтин авлод шаклланганини бутун дунёга намоён этдингиз. Ишончим комил, Япония заминида эришилган ютуқ ва натижалар, тўпланган тажрибалар 2028 йилда Лос-Анжелесда ўтадиган Олимпия ўйинлари учун мустаҳкам замин бўлиб хизмат қилади", дейилади Президент табригида.
