Осиё ўйинлари ғолибларига 25 минг доллардан берилади

Аичи-Нагоя-2026 Осиё ўйинларида совриндор бўлган ўзбекистонлик спортчилар давлат томонидан бир марталик пул мукофоти билан тақдирланади.

Белгиланган тартибга кўра, олтин медал соҳиби 25 минг АҚШ доллари, кумуш медал олган спортчи 12,5 минг доллар, бронза медал учун эса 6 250 доллар миқдорида мукофот пули олади.

Спортчиларни мусобақага тайёрлаган мураббийлар учун ҳам алоҳида рағбатлантириш белгиланган. Чемпион спортчи мураббийига 10 минг доллар, кумуш медал соҳиби устозига 5 минг доллар, бронза медал учун эса 2,5 минг доллар берилади.

Ушбу миқдорлар президентнинг 2026 йил 21 сентябрдаги ПҚ–347-сон қарори билан белгиланган.

Айни пайтда Ўзбекистон делегацияси Аичи-Нагоя-2026 Осиё ўйинларида 21 та олтин, 25 та кумуш ва 24 та бронза — жами 70 та медал билан умумжамоа ҳисобида 5-ўринни эгаллаб турибди.