Ўзбекистон медиа лойиҳалари Олмаотадаги халқаро бозорда тақдим этилди
Қозоғистонда ўтказилган World Content Market тадбирида актёр ва режиссёр Рашид Маликов Ўзбекистон медиа лойиҳалари, кино ва сериаллар ҳақида тақдимот ўтказди. Шунингдек, Ўзбекистон павильонида қатор нодавлат телеканаллар, онлайн платформалар ва хусусий киностудиялар вакиллари музокараларда иштирок этди.
Олмаотада ўтказилган World Content Market тадбирида Контент маркази вакили, актёр ва режиссёр Рашид Маликов Ўзбекистон медиа лойиҳалари, ишлаб чиқилаётган кино ва сериаллар ҳақида тақдимот ўтказди.
Тақдимотда ўзбек фильмлари ва сериалларини хорижий бозорларга олиб чиқиш, чет эл контентини харид қилиш ҳамда ҳамкорликда кино ва медиа лойиҳалар яратиш имкониятлари ҳақида сўз юритилди. Ўзбекистондаги суратга олиш масканлари ва маҳаллий ижодий жамоалар билан ишлаш имкониятлари ҳам таништирилди.
World Content Marketдаги Контент маркази томонидан ташкил этилган Ўзбекистон павильонида Sevimli TV, Zoʻr TV, MY5, Renessans TV, Biz TV, Солнечный ТВ телеканаллари ҳамда Salom TV, SPlay, Zoʻr Play, Biz Media онлайн платформалари, "Panorama Fox", "Media Show TV" каби хусусий киностeдиялар вакиллари қатнашиб, B2B музокараларда иштирок этишди.
Шунингдек, иштирокчилар 2027 йил 4–5 февраль кунлари бўлиб ўтадиган Tashkent Content Market тадбирига таклиф этилди ва бу иштирокчиларда катта қизиқиш билан қабул қилинди. Эслатиб ўтамиз, Тошкентдаги халқаро тадбирга рўйхатдан ўтиш TCM.uz сайтида давом этмоқда.
