Жиззахда ЙҲХБ инспектори иштирокидаги ЙТҲда бир киши ҳалок бўлди
Инспектор машинани маст ҳолда бошқаргани айтилмоқда. Ҳолат юзасидан суриштирув ҳаракатлари бошланди.
Зомин туманида ЙҲХБ инспектори иштирокидаги ЙТҲда бир киши вафот этди.
ЙТҲ 26 сентябрдан 27 сентябрга ўтар кечаси туманнинг Ёшлик маҳалласи ҳудудида содир бўлган. 34 ёшли Д.А. Lacetti машинасини бошқариб кетаётиб, ўзидан олдинда чапга бурилишни амалга ошираётган юк машинаси ортига бориб тўхтаган. Шунда бир йўналишда келаётган, Жиззах вилояти ЙҲХБ инспектори 27 ёшли Ж.А. бошқарувида бўлган иккинчи Lacetti ортдан келиб урилган.
Оқибатда олдиндаги Lacetti юк машинаси билан тўқнашган. Унда йўловчи сифатида кетаётган 35 ёшли Ф.Р. оғир тан жароҳати олиб, шифохонанинг жонлантириш бўлимига ётқизилган. Эркак кўрсатилган тиббий ёрдамга қарамай, шифохонада вафот этган.
Инспектор машинани маст ҳолда бошқаргани айтилмоқда.
Ҳозирда ҳолат юзасидан суриштирув ҳаракатлари олиб борилмоқда.
