Марказий банк "Анорбанк" масаласида баёнот билан чиқди
Ушбу банкнинг асосий акциядори Қаҳрамонжон Олимовга одам ўғирлаш айби қўйилганди. Олимов Ўзбекистонда сиртдан ҳибсга олинган ва халқаро қидирувга берилган.
Марказий банк сўнгги кунларда турли шов-шувларга сабаб бўлаётган "Анорбанк" масаласида баёнот берди.
Аввал маълум қилганимиздек, “Анорбанк” асосий акциядори Қаҳрамонжон Олимовга одам ўғирлаш айби қўйилганди.
Унга кўра, Олимов Ўзбекистонда сиртдан ҳибсга олинган ва халқаро қидирувга берилган.
Банкнинг расмий муносабатига кўра, мазкур ҳолат шахсий масала бўлиб, банкнинг капитали, бошқаруви ва операцион фаолиятига алоқадор эмас. Ваколатли органлар томонидан банкка ҳеч қандай расмий сўров ҳам келиб тушмаган.
Ўз навбатида, Марказий банк ҳам вазиятни назоратга олганини, ANORBANK фаолияти барқарор эканини, банкнинг барча мажбуриятлари бажарилаётгани ва мижозларга хизмат кўрсатиш одатий режимда давом этаётганини маълум қилди.
"Умуман, бизнесда раҳбарлар алмашиши, акциядорлар атрофида турли жараёнлар бўлиши — нормал ҳолат. Ҳар бир тарқалган хабарни банкда муаммо бошланди, деб қабул қилиш шарт эмас. Ахборот майдонида рақобат ҳам бор, манипуляция ҳам, турли манфаатлар ҳам бўлиши мумкин", дейилади муносабатда.
