Фарғонада "Инсон" маркази ходими бахтсиз ҳодиса сабаб вафот этди
Жорий йилнинг 28 июл куни кечки пайт Учкўприк тумани ҳокимлиги томонидан “маҳалла еттилиги” аъзолари ҳашарга жалб этилган.
Фарғона вилоятида "Инсон" ижтимоий хизматлар марказининг ходими бахтсиз ҳодиса сабаб вафот этди.
Ижтимоий тармоқларда Учкўприк туманида “Инсон” ижтимоий хизматлар маркази ходими Т.Жўраевнинг вафот этгани ҳақида хабарлар тарқалди. Ижтимоий ҳимоя миллий агентлиги ҳодисани тасдиқлади.
Жорий йилнинг 28 июл куни кечки пайт Учкўприк тумани ҳокимлиги томонидан “маҳалла еттилиги” аъзолари ҳашарга жалб этилган. Ҳашар пайтида ёлланма ишчилар томонидан фойдаланилаётган ўт ўрадиган асбоб пичоғи синиб кетиб, жараённи кузатиб турган Учкўприк тумани “Инсон” ижтимоий хизматлар маркази ходими Т.Жўраевнинг қорнига санчилиб, олган жароҳати сабабли ходим вафот этган.
Агентлик номидан марҳумнинг вафоти муносабати билан ҳамдардлик билдирилган, унинг оиласига зарур ижтимоий кўмак кўрсатиш давом эттирилиши айтилган.
Шунингдек, бундай фожиали ҳолатлар такрорланмаслиги учун ходимларнинг меҳнат хавфсизлиги, уларни хизмат вазифаларига кирмайдиган ишларга жалб этиш ҳолатлари ҳамда масъул шахсларнинг жавобгарлиги юзасидан атрофлича ўрганиш ўтказилиб, тегишли чоралар кўрилади, дейилади хабарда.
