Одилхон қори Исмоилов 8 йилга озодликдан маҳрум этилди

Одилхон қори Исмоилов 8 йилга озодликдан маҳрум этилди. Бу ҳақда Олий суд хабар берди.

Жиноят ишлари бўйича Поп туман судида О. И. (эркак, 1977 йилда Наманган вилоятида туғилган, “Rayxon oilaviy milliy taomlari” таъсисчиси, муқаддам судланмаган) ва бошқаларга оид жиноят иши кўриб чиқилди.

Суд ҳукмига кўра 7 нафар судланувчи Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми "а" банди, 209-моддаси (мансаб сохтакорлиги) 2-қисми "а" банди, 227-моддаси (ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисми "а" банди ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2-қисми "а", "б" бандларида назарда тутилган жиноятларни содир этганликда айбли деб топилди.

О. И.га 8 йил (Жиноят кодексининг 62-моддасига (ушлаб туриш, қамоққа олиш ёки уй қамоғи вақтини ҳисобга олиш қоидалари) асосан 7 йил 11 ой 28 кун) муддатга, қолган 6 нафар судланувчига жиноий хатти-ҳаракатларидан келиб чиқиб турли муддатларга озодликдан маҳрум қилиш жазолари тайинланди.

Жиноят иши доирасида етказилган моддий зарар судланувчилардан солидар тартибда ундирилиши белгиланди.

Биринчи инстанция судининг ҳукми устидан тарафлар қонунда белгиланган тартиб ва муддатда Наманган вилоят судининг апелляция/кассация инстанциясига шикоят бериш ва протест келтиришга ҳақлилиги маълум қилинади.

Одилхон қори шу йил январ ойида қўлга олинганди.