Қашқадарёда келинининг ўлимига сабаб бўлган қайнона беш йилга қамалди

Қашқадарё вилояти Қамаши туманида келинини мунтазам уриб, ҳақоратлаган, яқинлари билан мулоқотини чеклаган ҳамда уни ўзини ўзи ўлдириш даражасига етказган қайнона 5 йилга озодликдан маҳрум қилинди.

Қайд этилишича, 1976 йилда туғилган Г.Ч. 2023 йилнинг кузида ўғли Х.М.ни Е.А.га уйлантирган. Шундан сўнг улар бир хонадонда яшай бошлаган. Эри ва ўғлининг даромадлари ҳамда оиланинг бошқа мол-мулкини бошқариб келган аёл келинига ҳам ўз талабларини ўтказиб, уни ҳақоратлаган, урган, ҳуқуқ ва эркинликларини чеклаган.

2024 йилнинг октябрь–декабрь ойларида Г.Ч. келини ўзига тегишли бир жуфт тилла зиракни бошқа шахсга бериб юборганини билгач, унинг ота-онасини чақиртириб, бу масалани муҳокама қилган. Шундан кейин келинини ўзига тобе қилиш мақсадида унга мунтазам руҳий босим ўтказиб, шаъни ва қадр-қимматини камситувчи сўзлар билан ҳақоратлаб келган.

Г.Ч. мактабда фаррош бўлиб ишлаган даврида келинини мунтазам равишда ўз ўрнига ишга чиқарган. Унга чиқиндиларни тозалаш, пол артиш, сув ташиш ва сепиш каби ишларни қилдирган. Шунингдек, келинига ўғлига муносиб эмаслигини қайта-қайта айтиб, айтганини қилмаса, ота-онасиникига ҳайдаш ва ўғлини бошқасига уйлантириш билан қўрқитган.

Қайнона келинининг телефонини ҳам олиб қўйган. Оқибатда Е.А. ота-онаси ва яқинлари билан бошқаларнинг телефони орқали гаплашишга мажбур бўлган. Г.Ч. эса суҳбат вақтида унинг ёнида туриб, мулоқотини назорат қилган.

Е.А. маҳалла фуқаролар йиғинига мурожаат қилган. У қайнонаси билан келиша олмаётганини, қилган ишлари унга ёқмаётганини билдирган. Шунингдек, ота-онасиникида вақтинча яшаб туриш учун кийимларини маҳалла ходимлари ҳамроҳлигида олиб кетишни сўраган. Мурожаат юзасидан далолатнома тузилган.

2025 йил 28 июль куни Г.Ч. келини билан яна жанжаллашиб, унинг ўнг кўзига урган, фарзандини олиб қўйган ва ўзини калтаклаган. Ўша куни Е.А. ўз жонига қасд қилиш оқибатида вафот этган. Суд қайнонанинг мунтазам тазйиқлари келинни ўзини ўзи ўлдириш даражасига етказган, деб топган.

Жиноят ишлари бўйича Қамаши туман судининг 2026 йил 16 февралдаги ҳукми билан Г.Ч. Жиноят кодекси 103-моддаси 2-қисмининг “а” ва “б” бандлари бўйича айбли деб топилган. Унга нисбатан кодекснинг 57-моддаси қўлланиб, 5 йил озодликдан маҳрум қилиш жазоси тайинланган. Аёл суд залида қамоққа олинган.

Г.Ч.нинг ҳимоячиси ҳукм устидан апелляция шикояти берган. Апелляция инстанцияси 2026 йил апрель ойида ҳукмни ўзгаришсиз қолдирган.

Шундан сўнг ҳимоячи октябрь ойида тафтиш тартибида шикоят киритган. Қашқадарё вилоят судининг жиноят ишлари бўйича судлов ҳайъати ушбу шикоятни ҳам рад этган.