Фарғонада экология бўлими ходими 9,5 минг доллар билан ушланди
Ушбу ходим 2025 йил Бувайда тумани ҳокимининг қурилиш масалалари бўйича ўринбосари Сайиджон Хизиров билан тортишгани видеоси тарқалган ва унга куч ишлатилганди.
Фарғона вилоятининг Бувайда туманида экология бўлими ходими 9500 АҚШ доллари миқдоридаги порани олаётган вақтида қўлга олинди. Бу ҳақда вилоят ИИБ матбуот хизмати хабар берди.
Терговга қадар текширув материалларига кўра, мансабдор шахс туманнинг “Араб” маҳалласи ҳудудидаги 4 гектар ер майдонида ёввойи дарахтларнинг кесилиши ва ҳудуднинг қумдан тозаланишига бир йил давомида чора кўрмаслик эвазига фуқародан 10 минг доллар талаб қилган.
Вилоят ИИБ ҳамда бошқа ҳуқуқни муҳофаза қилувчи органлар ҳамкорлигида ўтказилган тезкор тадбир давомида пора олишда воситачилик қилган шахс ва пулни қабул қилган экология ходими ашёвий далиллар билан ушланган.
Шунингдек, воситачи бошқарувидаги автомобил кўздан кечирилганда, гиёҳвандлик воситасига ўхшаш моддалар ҳам аниқланиб, далилий ашё сифатида расмийлаштирилган. Мазкур ҳолат юзасидан Жиноят кодексининг 168 ва 211-моддалари билан жиноят иши қўзғатилиб, дастлабки тергов ҳаракатлари олиб борилмоқда.
Таъкидлаш жоизки, ушбу воқеа қаҳрамони жамоатчиликка яхши таниш.
Гап шундаки, 2025-йил ноябрь ойида Бувайда тумани Найман қишлоғидаги зовур ҳудудида дарахтларнинг ноқонуний кесилгани аниқланган эди.
Ижтимоий тармоқларда тарқалган видеоларда ўша пайтдаги Бувайда тумани ҳокимининг қурилиш масалалари бўйича ўринбосари Сайиджон Хизировнинг экология инспектори Аҳрор Ниязов билан тортишгани, унга нисбатан куч ишлатилгани ва инспекторнинг ҳудуддан олиб чиқиб кетилгани акс этганди. Ушбу ҳолат жамоатчилик орасида кенг муҳокамаларга сабаб бўлган эди.
